Lulja

Ky libër iu përket vetëm atyre që ndjejnë dhimbjen dhe ia kanë arritur, të paktën një herë në jetë, të prekin dashurinë plotësisht në të gjithë madhështinë e saj.
Rasti është i pabindur. Ajo që vjen nuk është asnjëherë në dorën e dikujt; ajo është thjeshtë një fat, për të cilin nuk mund të bëhen kurrë bisedime paraprake. Heronjtë e romanit tonë, Lulja dhe Arbeni, provuan pikërisht fatin.
Ngjarja ka ndodhur në dekadën e fundit të tiranisë.
Me sa më pak fjalë kam përshkruar dy personat kryesor që ndërthuren në këtë ngjarje, duke pasur në mënyrë permanente në mendje një këshillë - të mos bëhem kurrë i bezdisshëm, por dhe duke ditur që, kurrë është kurrë. Jam munduar që përmes dialogjeve dhe përshkrimit të ngjarjes, të jem sa më afër realitetit dhe të vërtetës së jetës në tiraninë komuniste - murtajës së shekullit XX.
Vetëm pasi mbarova universitetin, kuptova një thelb, gati biologjik të shoqërisë njerëzore: Dhimbja e tmerrshme që shkakton tirania shtetërore, deri në rrënimin e plotë të njeriut, është pronë vetëm e intelektit.
Shpresoj t’ia kem arritur qëllimit që i vura vetes kur nisa ta shkruaj.
Ligësitë e kohës t'ua lëmë për gjykim opinionit publik të së ardhmes.
Ramazan Kica