Mos Shko Ne Mikene Kur Bie Shi

Atëherë kuptova arsyen e vërtetë përse kishte ardhur. Një ndjenjë e ngrohtë më pushtoi për të. Po ta kisha njohur prej kohësh, do ishim bërë shumë miq.
- Për mua nuk tingëllon aspak normale që po lexonte një roman për fëmijë. Romani për fëmijë është dëshmi e vetëdijes së Klement Duros për krimin që do kryente dhe që e kreu, - thashë dhe do të doja që vetëm ai, shefi i policisë, dhe askush tjetër të më kuptonte. Do të dësh- përohesha sikur të mos më kuptonte. - Në të vërtet ai kishte dy ditë që lexonte, që përgatitej shpirtërisht për aktin që do kryente. Duke lexuar romanin për fëmijë, Klement Duroja kuptoi se jeta e tij nuk kthehej më pas, se asgjë nuk mund të fillohej nga e para. E ç'gjë më shumë se një roman për fëmijë, i lexuar në gjendjen e Klement Duros, mund të na zbërthejë të vërtetën. As tradhtia e gruas, duke mbetur te rasti i Klement Duros, nuk do ta shtynte të bënte atë që bëri. Atëherë kërkoi një shtytje tjetër. Ku ta gjente? E kërkoi te fëmijëria, te mosha kur ishte i pastër dhe i ndershëm. Se ai donte që krimi të kishte pikërisht këtë motiv. Atë e kreu një njeri i pastër, i ndershëm dhe krenar. A ishte i ndershëm dhe krenar Klement Duroja? Në mjerimin ku e kishte zhytur veten nuk kishte si të ishte. Kjo ia mpinte krahët. Atëherë kërkoi romanin për fëmijë që do ta kthente në vitet kur e kishte lexuar për herë të parë si të ishte vetë personazhi kryesor i romanit.
(Fragment nga romani "Mos shko në Mikenë kur bie shi