Laokooni

Leximi i romanit “Laokooni” i shkrimtarit, poetit, dramaturgut dhe kritikut letrar nga Gjakova, Kadrush Radogoshi, është një kënaqësi se jo vetëm na vë në kontakt me një letërsi cilësore, por edhe për të parë ecurinë e krijimtarisë së autorëve të njohur.
Me sa kemi lexuar, Laokoonit, personalitetit trojan, në letrat shqipe, i janë drejtuar dy autorë shqiptarë: Ismail Kadare, me poezinë shumë të bukur të tij “Laokooni” (libri “Koha”, 1976) dhe tani Kadrush Radogoshi me romanin e tij homonim.
Me gjithë distancimin në kohë dhe kontekstet e caktuara historiko-letrare të publikimit të veprave të tyre, te Laokooni, Kadrush Radogoshi, si dhe gjeniu i letrave shqipe, kanë kapur thelbin e figurës së tij.
Legjenda thotë se Laokooni ishte kundër pranimit të kalit të drunjtë të grekëve dhe si ndëshkim për këtë, hyjnitë progreke e mbytën me anë të gjarpërinjve. Një skulpturë e famshme e Rilindjes e paraqet në çastin e mbytjes. Ka të ngjarë që vdekja, mos më mirë të thuash vrasja e tij, të ketë qenë një vrasje politike, fill pas së cilës Troja ra me anë të tradhtisë.