KUDHES PERIVOLI është pjesë e traditës himarjote, pjesë e historisë, por dhe pjesë e zhvillimit. Kujtesa nuk njeh largime masive të banorëve si në vitin 1990. Kishin ndodhur shekuj më parë, por atëherë ishte luftë. Një ikje si kjo "me kuç e me maç", kur nuk kishte as luftë e as pushtues ishte sa befasuese, aq dhe e rëndë.
Ndonëse ka tri dekada, që ka ndaluar ritmi në punët e fshatit, këtu, gjithçka është në pritje. Këtu ka mbetur historia, ka mbetur bukuria e punës së brezave, ka mbetur natyra e mrekullueshme dhe emri i të parëve! Çdonjëri, që është larguar, ka lënë një copë. Mbase është në tokë, në ajër a në shpirt, por kalojnë vite, dekada e brezat janë kujtuar e prapë do të kujtohen për rrënjët, se origjina ime apo e të parëve të mi është nga Kudhësi i Himarës, nga Kudhës Perivoli.
Eshtë detyrë dhe nder i gjithkujt të bëjë atë, që është më mirë, për të mos arritur te "Na ishte njëherë Kudhës Perivoli!" apo "Ka qenë një fshat midis Qeparoit e Kuçit!". Kudhësi, është e duhet të mbetet i kudhësiotëve në shekuj, me apo pa shtëpi, me apo pa prona!
