Petrela Gjate Shekujve

Pa mëdyshje botimi i këtij studimi do të jetë një burim me vlera studimore por edhe didaktike, për çdokënd që do të merret me historinë e kësaj qyteze dhe më gjërë, për nxënësit e shkollave që duhet të njohin dhe dashurojnë vendin dhe tokën e tyre, historinë dhe të parët e tyre në rrugën e gjatë dhe plot lavdi te gjeneratave.
Duke shtuar edhe dy fjalë për autorin Adem Kupi, nuk do ta tepronim të thoshim se punimi i realizuar pas një pune të gjatë shumë vjeçare prej tij, mbart emocione dhe dashuri evidente, mallin për vitet dhe vendet ku ai ka kaluar vitet e bukura të fëmijërisë, adoleshencën, rininë, por edhe vitet e maturimit dhe të pleqërisë së tij. Bashkë me të aty ruhet një ekuilibër i nevojshëm, i admirueshëm objektiviteti, korrektësi shkencore dhe format akademik që kërkojnë shkrimet e kësaj natyre. I trajtuar në këtë mënyrë, pa mëdyshje, ky botim serioz do të zërë një vend me vlerë në fondin e studimeve historike, për sot dhe të ardhmen, për këtë qendër të lashtë historike të vendit tone.