Harry Fultz Shkolla Qe Ndryshoi Shqiperine

Libri i Joan J.Kontos na paraqet një studim të shkëlqyeshëm dhe është ndihmesë e çmuar për studimin e shoqërisë shqiptare gjatë viteve 1920 dhe fillimit të viteve 1930. Gjatë një vizite në Shqipëri në qershor të vitit 1973, pata rastin të takohem në Tiranë me një mësues të mirënjohur pensionist. Ky më foli gjatë me shumë entuziazëm për Shkollën Teknike shqiptaro-amerikane. Nga ky takim si edhe nga biseda të tjera me shqiptarë, të formuar mes dy luftërave, dukej qartë me sa dashuri e ngrohtësi flitej për Shkollën Teknike shqiptaro-amerikane, për drejtorin si dhe gjithë personelin arsimor të shkollës. Në fjalët e tyre çmohej sinqerisht roli që ka luajtur shkolla në modernizimin e vendit. Këto ndjenja shpreheshin më së miri e më prekshëm ndofta nga mësuesi pensionist në Tiranë, i cili theksoi: "I detyrohet kryesisht punës shembullore të kryer nga z. Fultz dhe djemve të edukuar prej tij, që u ngjall te ne besimi se ndërtimi i Shqipërisë moderne përparimtare ishte mundësi reale e jo thjesht retorike politike ose ëndërr e zbrazët".