Nacionalisti Dinak

Në vizionin e vet Enver Hoxha udhëhiqej nga nacionalizmi i rreptë. Del se ai ishte njëri ndër dy burrat e shtetit bashkëkohës që De Goli i admironte më shumë. Në njëfarë mënyre, më tepër, madje, edhe se Stalini, Hoxha kishte një vizion për "socializmin në një vend të vetëm"; jo për arsye gjeostrategjike, por nisur nga gjoja pastërtia e kulluar ideologjike, e cila shërbente si mbulesë e përshtatshme për nacionalizmin.
Ai ishte jo vetëm një orator i zoti (veti që dikush mund ta ketë edhe pa pasur kontakte me masat), por ishte shumë i aftë në takimet me popullin, duke hedhur e pritur shakara e duke kënduar apo recituar pjesë nga folklori krahinor. Në këtë drejtim e ndihmonte edhe fakti që te ai shkriheshin në mënyrë të rrallë intelektuali dhe burri tërheqës e i pashëm. Ndonëse Hoxha nuk mund të krahasohet, duke e futur në një thes me shumicën e udhëheqësve të tjerë të vendeve të Botës së Tretë (mjaft të mendosh që intelekti i tij qëndronte shumë e shumë herë më lart)... Kujtimet e Hoxhës na tregojnë se si duhet të mendojnë shumë udhëheqës të vendeve të Botës së Tretë. Nacionalizmi është kriteri mbizotërues. Kësisoj, siguria del në plan të parë, e shoqëruar nga vigjilenca e vërtetë, por edhe nga obsesionet dhe paranoja.