Epiri I Jugut Cameria

“Epiri i Jugut, Çamëria” është një kontribut i përbashkët i një grupi studiuesish të mirënjohur si Romeo Gurakuqi, Sami Repishti, Ferit Duka, Ledia Dushku, Ksenofon Krisafi, Fatmira Rama, Selman Sheme dhe Mentor Nazarko. Profesor Romeo Gurakuqi si drejtues shkencor i projektit dhe në cilësinë e një prej autorëve të librit tha se ky botim është një përpjekje për njohjen e së vërtetës historike të periudhës moderne të rajonit tokësor ku dy blloqe kompakte etnike, greke dhe shqiptare, bashkohen së bashku në Epir. Ndërsa për Shpëtim Idrizin, kryetarin e PDIU që ka shkruar edhe parathënien e librit, kjo është një ngjarje e veçantë. Realizimi i kësaj përmbledhje për Çamërinë, është një sfidë jo vetëm për nga forma, duke konsideruar një numër autorësh që kanë kontribuar me fakte dhe argumenta të këndvështrimeve të ndryshme, por edhe nga përmbajtja, për faktin se çështja çame është ende pjesë e rëndësishme e tryezave të përbashkëta dhe diskursit politik ndërkufitar greko-shqiptar.