Berati Kronike Nga 97

Ngjarjet në libër i referohen vitit tronditës 1997.
Ja si e nis parathënien e këtij libri, autori:
Në fillim të verës të vitit 1998, në hyrje të shëtitores së qytetit të Beratit, që atëherë ishte një shesh i gjerë, i asfaltuar dhe me pemë nga të dyja anët, ranë disa plumba qorr që e fshikulluan asfaltin me një zhurmë të mprehtë. Aty pranë ishte duke kaluar një grup djemsh, që kishte dalë shëtitje në të mbaruar të asaj dreke të gjatë verore. Një nga ata djem, të cilët u panë në sy duke qeshur, isha unë. Grupi vazhdoi shëtitjen i qetë, duke u përzier me ata kalimtarë indiferent që kishin dalë në atë orë dhe plumbat u rrokullisën kushedi se ku larg tyre. Megjithëse vetëm për pak metra ata djem mund të kishin humbur jetën, çdo gjë rrodhi si më parë dhe shëtitorja vazhdoi të priste kalimtarët e radhës.