Forma Permbajtja Dhe Arkitektura

“Forma, përmbajtja dhe Arkitektura – Udhëtim në banesën popullore shqiptare”, i autorëve Maksim Mitrojorgji dhe Joli Mitrojorgji është libri që sjell një vështrim interesant për rrugën që është ndjekur për realizimin e formës në arkitekturën e banesës popullore shqiptare.
Ky botim mbi arkitekturën e banesës popullore shqiptare ndjek rrjedhën e një pune kolosale, mbi pesëdhjetë vjeçare, të bërë në Shqipëri, për evidentimin e monumenteve të arkitekturës në përgjithësi dhe atyre të tipologjisë së banesës popullore në veçanti.
Në arkitekturën e traditës, jo domodshmërisht duhet të vlerësojmë vetëm atë që shohim si të ndërtuar, një relike me vlerë të trashëguar nga e shkuara. Para së gjithash, libri na mëson, se duhet të përpiqemi të flasim me atë relike të bukur, të përpiqemi të dallojmë se si është ideuar dhe ndërtuar, të dallojmë arsyet se në ç’mënyrë i ka qëndruar provave të kohës, si dhe të dallojmë edhe arsyet shoqërore, psikologjike e estetike të lindjes dhe përcjelljes së formës së saj ndër shekuj.