Guvernatori I Hitlerit Per Ballkanin

Hermann Neubacher: …Ribentropi më telefonoi në Beograd dhe më njoftoi se Fyhreri dëshiron “një Shqipëri të pavarur e shpallur me iniciativën e vet” dhe unë duhej, nesër në 11 shtator, të shkoja tek divizioni gjerman në Elbasan. Me një avion special do më dërgohej një njohës i gjuhës dhe zakoneve shqiptare, i cili do më shoqëronte në Shqipëri. Unë duhej të marshoja me këtë divizion drejt Tiranës që të realizoja misionin e ngarkuar…
…Shqiptarët e dinin fare mirë që ne kishim marshuar në Shqipëri vetëm për arsye të ngutshme ushtarake, për t’u mbrojtur prej sulmit nga krahët, me të cilin na kërcënonin Aleatët nëpërmjet ngushticës së Otrantos. Mua nuk më kujtohet asnjë akt armiqësor i popullsisë kundër Vermahtit gjerman. Veç kësaj Gjermania gëzonte një emër të mirë në Shqipëri. Vërtet ky nam pësoi diçka kur Gjermania e toleroi sulmin italian të 7 prillit 1939, por tani gjermanët po i çarmatosnin italianët dhe me këtë rast madhështor shqiptarët mund t’i shumonin armët në shtëpitë e tyre…