Histori Shpirtrash

"Ana qe dashuria e jetës së tij, por ajo e braktisi, ishte ende e re. Pas filmit Ana u ul të pinte një kafe në barin e hollit të kinemasë dhe turma solli me vete pranë saj Tomasin. Ti je dashuria e jetës sime.
Ndoshta fjalia ishte thënë në filmin që kishin parë të dy atë mbrëmje. Alberti mund të kishte qenë njëri prej personazheve të filmit, sepse ai thoshte shpesh fjali të tilla. Dhe pati të drejtë, sepse ajo e la. Ana i kthen shpinën kantierit. Imagjinon Tomasin t’i thotë këto fjali. Ti je dashuria e jetës sime. Por ti do të më braktisësh. Je ende kaq e re. Shumicën e kujtimeve, pas kaq shumë vitesh bashkë, Ana është e sigurt që i ka me Tomasin. Por ajo s’do ta pyesë, nëse kishte qenë ai që kishte qëndruar pranë saj në ballkon dhe i kishte treguar qytetin, duke bërë shenja me dorë. Ndoshta lëndohej, që ajo s’e përcaktonte dot figurën e mashkullit që ndodhej atje lart."