Nje Grua Midis Dy Burrave

NGA NJË ANË KRESHNIKU, biri i një shqiptari të arratisur dhe të mërguar në Amerikë në vitin 1985, që vritet nga banditë duke mbrojtur jetën e një polici. Atij i pëlqen arti, veçanërisht letërsia, që arrin, madje, të botojë me sukses poezitë e para. Përballë tij, Çarli, edhe ai i ri, me të ardhme të sigurtë në fushën e shkencës. Midis tyre, Meri, vajzë që pret të bëhet doktoreshë, e fejuar me Çarlin, por që zbulon te Kreshniku, djaloshin me fëmijëri të zymtë e virtyte të rralla. Jetim, i adaptuar nga një mik amerikan i babait të tij, por kumarxhi dhe sarhosh, Kreshniku bie në rrjetën e një bosi të trafikut të drogës.

KËTU NIS DËSHIRA E ZJARRTË e Merit, tanimë e dashuruar pas Kreshnikut, që ta shkëpusë atë nga kjo botë plot rreziqe dhe nga kërcënimi ashpër i atyre që kërkojnë, kundër dëshirës së tij, ta mbajnë rob të drogës, dhe, nga ana tjetër, kërcënimi i ligjit, gjithnjë i pamëshirshëm, që e ndjek hap pas hapi.

ME NGJARJE TË VRULLSHME, plot të papritura, intriga, pabesi, lexuesi shtyhet ta lexojë me kërshëri këtë roman me temë amerikano-shqiptare, shkruar nga dy autorë, njëri shqiptar dhe tjetra amerikane.