Princesha

Në një tokë ku ligjin e bëjnë mbretërit, unë jam princeshë. E kam të pamundur t’u tregoj emrin tim të vërtetë, sepse familja ime do ta pësonte keq për shkak të atyre ngjarjeve që do të zbuloj përpara jush.
Jam princeshë saudite, anëtare e familjes mbretërore në oborrin e Al Saudëve. Si grua e një vendi ku ligjin e bëjnë burrat, nuk mund t’u flas drejtpërdrejt. Unë i kërkova shkrimtares e mikes sime amerikane, Jean Sasson, që të më dëgjonte e pastaj t’u tregonte historinë time.
Për çudinë time të madhe, toka e të parëve të mi, ka ndryshuar fare pak nga ajo e mijëra vjetëve më parë. Është e vërtetë që ndërtesat moderne lartohen drejt qiellit e shërbimi shëndetësor i fjalës së fundit u ofrohet të gjithëve, por kur vjen fjala për gratë e për jetën që bëjnë ato, përgjigjja që merr është një ngritje supesh me indiferencë.