Vrasja Ne Famulli

Vrasja në famulli është libri i parë policor i Agatha Christie me protagoniste hetuesen e mençur, zonjushën Marpëll, që vë në provë të gjitha aftësitë e talentet e saj të vëzhgimit dhe analizës.
Në Shën Mari Med, një fshat i qetë në fushat angleze, jeta rrjedh monotone, nuk ndodh kurrë asgjë e re. Ose të paktën kështu mendojnë të gjithë. Përveç zonjushës Marpëll, e cila është e bindur se e keqja mund të fshihet kudo. Dhe me të vërtetë, si për të vërtetuar teorinë e gruas së moshuar, të këndshme dhe paksa të çuditshme, pikërisht në famullinë përballë shtëpisë së saj në stil viktorian, kryhet një krim i egër. Krimi i papritur trondit gjithë fshatin, aq më tepër që viktima, koloneli Protero, fodull dhe prepotent, ka qenë njeri shumë i njohur, edhe pse i urryer deri edhe nga të afërmit.
Hetimet e policisë lokale nuk zbulojnë asgjë, por zonjusha Marpëll, me mendjen e mprehtë brisk dhe intuitën e lindur, falë aftësisë për t’u vënë veshin fjalëve në fshat dhe për të hyrë thellë në shpirtrat e njerëzve, do të jetë në gjendje të zbulojë fajtorin, tek i cili askujt nuk i shkon ndër mend të dyshojë.