"Fit fabricando faber!" (Farkëtari bëhet mjeshtër në punishte!)
Edhe shkenca mësohet në "punishtet e shkencës", nëpër universitete, nëpër atelietë e dijetarëve, shkencëtarëve, profesorëve, akademikëve, nëpër institute, amfiteatro, klasa, salla, zyra ku ata flasin, ligjërojnë, ku shkenca ushtrohet si zanat apo thirrje (Wissenschaft als Beruf-Weber), si paradigmë që avancon individë dhe shoqëri. Të shkruarit e një disertacioni ose teze është ndërmarrje e jashtëzakonshme, është punë e njerëzve të zgjedhur, pra punë elitare, punë individuale (nën mbikëqyrje të mentorit), aplikim metodologjie, prurje origjinale dhe kontribut shkencës, botës akademike dhe komunitetit në përgjithësi. “Është një proces i gjatë, në të cilin kandidatët përballen me sfida intelektuale dhe emocionale në çdo hap" (Murray & Beglar, 2009: xiii), kulturë specifike.
Libri "Hulumtimi dhe shkrimi i disertacionit të doktoratës" i sociologut të njohur shqiptar prof.Dr. Hasan Jasharit (i 17-ti me radhë), paraqet një studim rreth arkitekturës së doktoratës, përpiluar nga një ekspert i fushës, i metodave të kërkimit, i cili për një dekadë ka menaxhuar studimet e Ciklit të Tretë (Shkollën e Doktoratës) në Universitetin e Evropës Juglindore.
Prof. Dr Ali Pajaziti
Libri më i ri i prof.dr. Hasan Jasharit "Hulumtimi dhe shkrimi i disertacionit të doktoratës" flet për zgjuarsinë dhe motivimin që duhet ta ketë një doktorant gjatë procesit të artikulimit dhe shkrimit të disertacionit. Kjo sidomos ndodh në kohën kur gjithnjë e më tepër opinioni publik ka qasje kritike për cilësinë e arsimit sipëror dhe kur çdo ditë nga disertacionet kërkohet më tepër hulumtim, origjinalitet dhe etikë profesionale. Autori, me përvojën dhe profesionalizmin e tij, është në gjendje që këto dukuri t'i shohë në të gjithë tërësinë dhe gjerësinë e tyre dhe, në rastin e këtij libri, e bën atë në një mënyrë të saktë dhe tepër praktike.
Prof. Dr Lejla Abazi
