Albtrans Top Sekret

Njerëzit me mend, që e kishin ndjerë nga afër hapjen e Albtrans-it atëherë, u sugjestionuan për momentin. Nuk është rastësi që në atë kohë asnjë fjalë nuk u fol për këtë bashkëpunim me kapitalin e huaj, sepse njerëzit, nga gëzimi kishin frikë ta përmendnin. Kishin frikë se mos prishej. Ata nuk i prekte fare fakti që Albtrans-i do të inkurajonte tregun e zi dhe kontrabandën e cigareve te fqinji më i zhvilluar që kishim, te Italia. Siç dukej, i kishte ardhur koha postulatit “Secili për vete dhe Zoti për të gjithë!”.
Thuhej gjithashtu që Komandanti e dinte mirë se kjo kontratë do të shkaktonte reaksion, ndaj dhe e pati gati justifikimin para kolegëve atje lart, se ndërmarrja tregtare Albtrans do të jetë një ndërmarrje sekrete, që do të kamuflojë një “Pikë të Avancuar të Zbulimit të Shtetit”, e cila do të organizohet brenda saj. Alibia, po ta emërtojmë kështu, mishëronte një taktikë gjoja për çarjen e murit imagjinar të “rrethimit të egër kapitalisto-revizionist”. Ky mendohet të kishte qenë argumenti më i pranueshëm për t’i bindur “shokët e tij” të Partisë për Pse-në e shkeljes së parimit “Me forcat tona”...