Pragmatizmi

Pragmatizmi, është një lëvizje filozofike, e zhvilluar në SHBA, e cila pohon qëndrimin sipas të cilit si domethënia ashtu edhe e vërteta e një ideje është në funksion të rezultatit të tij praktik. Pra, thelbësisht pragmatizmi është një antiabsolutizëm i fortë: bindja që të gjitha parimet lipset të shihen më shumë si hipoteza në zhvillim e sipër se sa si aksioma rreptësisht metafizike. Si një shprehje moderne e empirizmit, pragmatizmi lulëzoi e arriti të ndikonte mjaft në jetën amerikane që në gjysmën e parë të shekullit të XX - të, duke u prirur t'i trajtonte rezultatet tradicionale filozofike nën dritën e zhvillimeve shkencore dhe sociale. Charles Sanders Piers njihet si ati themelues i pragmatizmit që në vitin 1870, duke e formuluar atë së pari si një teori e kuptimit. Ishte William James (1842-1910), një nga udhëheqësit më autoritarë të kësaj lëvizjeje, i biri i filozofit Henri James Senior dhe vëllai i romancierit të famshëm Henri James, ai që e zhvilloi pragmatizmin si një teori të së vërtetës. Sipas tij, idetë e vërteta janë "udhëheqëset" më të dobishme. John Dewey është një tjetër zë i fuqishëm pragmatist, ndikimi i të cilit në edukimin dhe teorinë sociale është mbizotërues ende edhe sot në shoqërinë amerikane.