Shah Name

“Shah-name” e Firdeusiut përfaqëson një prej përmendoreve madhështore të kulturës botërore, që bashkërenditet për nga fuqia shprehëse me eposin homerik helenik - “Iliada” dhe “Odiseja”, me “Vedat” sanskrite, me “Ramajana-n” dhe “Mahabharata-n” hinduse, me “Gilgameshin” e shumerëve dhe “Qadesh-in” e egjiptianëve të vjetër, me “Torah-un” aramaik e “Eneida-n” romake.
Sipas studiuesit italian I. Pizzi, njëkohësisht dhe përkthyes i “Shah-name-së” në italisht me titull të kalkuar “Il libro dei Re”, Firdeusiu, “qendron denjësisht përkrah Homerit e Dantes, Eskilit, Virgjilit e Shekspirit, të cilëve kohët që erdhën pas tyre u mbeten borxh”. Sipas studiuesit gjerman Kurt Gostentschnigg, poeti i madh pers i “Shah-name”-së mund të quhet “Homeri i Lindjes”. Në “Shah-name” ka po aq tragjedi për çështjen e fronit e të kurorës, sa thuajse në gjithë letërsinë e kalorësve dhe heronjve europianë, deri tek tragjeditë e Shekspirit.