Shoqeria Periferike

Në këtë libër, autori trajton me përparësi përgjigje rreth pyetjeve si më poshtë:
Si e ndikoi i ashtuquajturi “Ligji për Tokën", numër 7501, ekonominë shqiptare në vitet '90 dhe në vazhdim dhe çfarë pasojash negative pati ai mbi prodhimin e ekonomisë vendase? Emigrimi brenda dhe jashtë vendit i masave të gjera të popullsisë e pasuron apo e ka varfëruar shoqërinë shqiptare? "Ekonomia e përmbysur" në zonat e mëdha urbane është bërë modeli ekonomiki tyre. Përse ajo prodhon varfëri urbane, papunësi, rritje taksash lokale dhe boshatisje demografike të territorit? Përse Republika jonë i politizon të gjitha instancat shtetërore dhe nuk siguron dot ndarjen e pushteteve si atribut dhe kusht për një shtet ligjor? Përse nga ndarja e pronës dhe e pasurive të kohës socialiste qytetari doli me duart bosh dhe pasuria u grumbullua vetëm në disa duar të lidhura me pushtetet e kohës? Cilat janë nëngrupet shoqërore që i japin tiparet shoqërisë periferike? Përse ra shqiptari në kurthin e “shoqërive financiare piramidale" si një kapitalizëm financiar utopik dhe kaotik? Si e humbi Shqipëria koherencën dhe unitetin ekonomik dhe shoqëror të territorit të saj? Përse përpjekja për demokratizim dhe emancipim shoqëror u shoqërua me një varfërim dhe prapambetje teknologjike dhe në strukturat e prodhimit material? Si e humbi Shqipëria "trenin" e integrimit në Bashkimin Europian?