Xheni Gerhard

“Xheni Gerhardt” doli në dritë në tetor të 1911. Drajzeri pati heshtur si romancier për më se dhjetë vjet, pas një sërë fatkeqësish që iu desh të përjetonte mbas botimit të romanit “Motra Keri”. Duke u marrë me gazetari, Drajzeri përpunonte mendimet për këtë krijim të ri dhe mblodhi për të një sasi të madhe e të rëndësishme materialesh.
Tiparet e dukshme autobiografike, sidomos në vizatimin e karakterit të plakut Gerhard, i cili ngjason deri në detaje të imta me plakun Drajzer e bëjnë këtë vepër të ndjeshme dhe njëkohësisht të besueshme. Kjo është njëra nga arsyet që ky roman është vepra më e adhuruar nga vetë shkrimtari.
Romani i ndërtuar me kontraste të thella, është një tablo e madhe ku spikatin lojërat brilante dhe mjeshtrore të penës së Drajzerit, mjeshtria e të cilit i bën të pakrahasueshme karakteret dhe situatat e veprës, që përcaktojnë thellësisht psikologjinë e kohës dhe ndryshimin e moralit e njeriut i cili është vendosur mes dy botëve: asaj të ekzistencës dhe lakmisë për kapital.