Dramat E Sofokliut

Ky nuk është një ribotim i zakonshëm i Sofokliut. Është një libër shumë i veçantë; aq sa vështirë se mund t'i gjendet shoqi në krejt historinë botërore të botimeve dhe ribotimeve të dramave të Sofokliut. Këtë veçanti ia jep jeta e përkthyesit që lidhet edhe me historinë e përkthimit të vetë librit... Kujtim Aliaj ka rënë në burg në moshën 15 vjeçare, është dënuar fillimisht 5 vjet për tentativë arratisjeje dhe ka mbetur, imagjinoni, 32 vjet, që nga viti 1955 deri në vitin 1987, pandërprerë, në burg... Të gjallët, mendoj, duhet të gjejnë kurajën për t'u ndalur, me dhimbje dhe revoltë përpara të pariparueshmes që ka ndodhur. Duhet të gjejmë kurajën për t'u ndjerë fajtorë kur shohim se, të frikësuar nga takimi me të, nuk bëjmë asnjë hap që të shkojmë t'i gjejmë ëndrrat e atyre njerëzve, të transformuara në një hi e pluhur të veçantë, që vazhdon të endet në dheun dhe ajrin e atyre vendeve të mallkuara... Ky libër është jo vetëm një përkthim i vyer i Sofokliut, por me të gjithë historinë e tij, është edhe një shenjë, një gjurmë më shumë, që mund të na ndihmojnë ne dhe brezat pasardhës në atë udhëtim të mundimshëm që kemi detyrë të bëjmë në emër të riparimit të së pariparueshmes.