Rendi I Dites

Ata ishin njëzet e katër, pranë pemëve të vdekura, njëzet e katër pardesy të zeza, të kafta apo të kuqërremta, njëzet e katër palë supesh të fryra me vata të leshta, njëzet e katër kostume dhe po aq pantallona me penca e manshete të gjera. Hijet depërtuan në hollin e madh të pallatit të presidentit të Asamblesë; por së shpejti, nuk do të ketë më as Asamble, as president, dhe pas ca vitesh, s'do të ketë madje as Parlament, vetëm një grumbull rrënojash shkrumb e hi.
Tani për tani, heqin njëzet e katër kapele plisi dhe zbulojnë njëzet e katër koka tullace apo rreth tullës me flokë të bardhë. I shtrëngojnë duart denjësisht para se të ngjiten në skenë. Patricët e nderuar janë aty, në hollin e madh; shkëmbejnë ca fjalë të përgjithshme, të respektueshme; të duket sikur jemi të pranishëm në fillimet e ngrehura të një garden-party.